Dear Papa n Maa..
Yaad aaya hai aaj mujhe wo bachpan jab aapki ungli pakadkar chalna seekhti thi, aapko ghoda banakar aapki sawari kiya karti thi, jab aap meri chhoti se chhoti aur badi se badi maang bade pyaar se poori kiya karte the.
Yaad aaya hai aaj mujhe wo bachpan jab aap mujhe padhaya karte the aur kuch yaad na nikalne par aap mujhe daata karte the, main roti thi, aur phir aap mujhe pyaar se samjhakar chup karaya karte the.
Yaad hai mujhe jab aap office tour par jate the, tou mujhe aapke lautne ka intzaar kis kadr rehta tha, kyunki aap mere liye kuch na kuch lekar aaya karte the..
Bachakar rakhte the aap mujhe buri nazron se..sab yaad hai mujhe, raat mein sote sote achanak dar ke uth jaya karti thi main, aur aapke paas aate hi neend aajaya karti thi, aapse lipatkar so jaya karti, malum tha ki ab main surakshit hun, kyunki aap mere saath hain. aapke gale lagkar bhool jati thi main duniya ko, malum tha..aap hain mere saath, aapka mere saath hone ka ehsaas hi kafi hai mere liye, jo hamesha mujhe himmat deta hai.
Aapke diye aadarsh dhyan hain mujhe..
Zindgi mein abhi tak bahut se log aaye aur gaye, kuch acchhe to kuch bure, kuch thaher gaye, par un sab se uppar aap aur maa hain mere liye, aap anmol hain.
Is bhaagte hue daur mein, ek doosre se aage nikalne hi hodh mein..main bhi bhaag rahi hun, kabhi kabhi mann karta hai ki aap mujhe ek baar phir gale laga len aur bolen ki beta kuch nahi hoga, main hun..
Kabhi kabhi mann karta hai ki is duniya ko chhodh apni duniya apne parivaar ke beech mein phir wapas aa jaun aur dobara bacchhi ban jaun jiske pankh the, aur un pankho ki madad se wo jitna chahe uncha udh jati thi, use pata tha ki wo giregi zaroor par aap use sambhal lenge, dobara wahi bacchhi ban jaun jo apno ke alawa kisi ko nahi jaanti, kyunki uske maa papa aur uska parivaar hai uske saath..hamesha hamesha ke liye..
Love u Maa n Papa..aapke bina main kuch nahi..na hi thi aur na hi hongi..:)
